सरकारी कार्यालयमा सेयर किनबेचमा रोक

नागरिक सेवा प्रभावित भएकाले कार्यालय समयमा अन्य गतिविधि कम गर्न प्रधानमन्त्री केपी शर्मा ओलीले कर्मचारीहरूलाई निर्देशन दिएका छन् ।

प्रधानमन्त्री ओलीले सामाजिक सञ्जालमार्फत कार्यालय समयमा सरकारी कार्यालयमा टीएमएस सञ्चालनमा प्रतिबन्ध लगाइएको जानकारी पनि दिएका छन् । ‘सरकारी कार्यालयमा बसेर सेयर बजारमा निजी कारोबार गर्नु कानुनी दृष्टिले पनि अमान्य छ । यसले सरकारी कामकाजमा प्रतिकूल प्रभाव परेको छ भने सेवाग्राहीको काम प्रभावित भएको गुनासो आइरहेको छ,’ प्रधानमन्त्री ओलीले सामाजिक सञ्जालमा लेखेका छन्, ‘यही जनगुनासोलाई सम्बोधन गर्दै अब सरकारले देशभरिका सबै सरकारी कार्यालयमा सेयर कारोबार गर्ने प्रणाली (टीएमएस) प्रतिबन्ध लगाएको छ ।’ सबै मन्त्रालय, आयोग, सचिवालय, स्थानीय तहका कार्यालयमा टीएमएस नचल्ने बनाउन निर्देशन दिइएको छ । सरकारी कार्यालयमा अब सरकारी काम मात्र गर्न पनि प्रधानमन्त्री ओलीले आग्रह गरेका छन् ।

कार्यालय समयमा सरकारी कर्मचारी सेयर कारोबारमा व्यस्त भएकाले सेवा प्रभावित भएको भन्दै अख्तियार दुरुपयोग अनुसन्धान आयोगमा उजुरी परेको थियो । उजुरीका आधारमा अख्तियारको टोलीले सिंहदरबार परिसर र अरू केही सरकारी कार्यालयको निरीक्षण पनि गरेको थियो ।

स्थलगत निरीक्षणका क्रममा पनि सरकारी कर्मचारी कार्यालयमै सेयर कारोबारमा व्यस्त रहेको पाइएपछि उक्त कार्य रोकेर सेवा प्रवाहलाई प्रभावकारी बनाउन आयोगले गत साता प्रधानमन्त्री तथा मन्त्रिपरिषद्को कार्यालयलाई पत्र लेखेको थियो ।