प्रदेश नं २ का बिभिन्न मेडिकल कलेज तथा अस्पतालमा गरेर एक सय १५ शय्या आईसोलेसन वार्डको निर्माण हुँदै
जनकपुरधाम– कोरोना भाइरसको संक्रमणबाट जोगाउनका लागि प्रदेश नं २ का बिभिन्न मेडिकल कलेज तथा अस्पतालमा गरेर एक सय १५ शय्या आईसोलेसन वार्डको निर्माणका लागि प्रदेश नं २ का स्वास्थ्य निर्देशनालयले तीब्र गतिका साथ काम अघि बढाएको छ ।
जनकपुरमा रहेको प्रादेशिक अस्पतालमा तीन वटा, नारायणी उपक्षेत्रीय अस्प्तालमा पाँच वटा, जानकी मेडिकल कलेज एवं शिक्षण अस्पतालमा ६० वटा तथा नेशनल मेडिकल कलेजमा पनि ५० वटा आईसोलेशन वार्डको निर्माणका लागि काम अगाडी बढाएको प्रदेश नं २ का स्वास्थ्य निर्देशनालयका उपनिर्देशक बिजयकुमार झाले जानकारी दिए ।
प्रदेश नं २ मा पनि हालसम्म एक जनामा पनि कोरोनाको संक्रमण नदेखिएको भएपनि पूर्व सतर्कताका लागि आईसोलेसन वार्डको निर्माण कार्य अगाडी बढाएको उपनिर्देशक झाले जानकारी दिए ।
यसैगरी कोरोनाको संक्रमण हुन नदिनका लागि सीमा क्षेत्रमा बिशेष निगरानी बढाउने काम भएको छ । बिभिन्न पालिकाहरुमा पनि हेल्थ डेक्स सञ्चालनका लागि काम अगाडी बढाएको स्वास्थ्य निर्देशनालयले जनाएको छ ।
भारतबाट आईरहेका दुई जना यूवालाई धनुषा जिल्लाको सिमानामा पर्ने भारतको जयनगरमा भारत सरकारले राखेको कोरोना हेल्थ डेक्सले शंकाको आधारमा मधुबन्नी जिल्लाको सदर अस्पतालमा लगेर चेकजाँच गराउदा निगेटिभ रिपोर्ट पाईएको धनुषाका प्रमुख जिल्ला अधिकारी प्रदिपराज कणेलले जानकारी दिए ।
यसका बाबजूद पनि भारतमा कोरोनाको संक्रमण देखा परेको र खुल्ला सीमाना भएका कारणले सीमा क्षेत्रमा निगरानी बढाउने काम भएको प्रमुख जिल्ला अधिकारी कणेलले जानकारी दिए ।
उता सरकारी बिद्यालयहरुमा आजदेखि दुई सिफ्टमा गरेर भएपनि ६ गतेसम्म बार्षिक परीक्षा सक्ने गरी परिक्षा शुरु भएको छ । जनकपुरधाम उपमहानगरपालिकाको सबै सामुदायिक बिद्यालयहरुमा आजदेखि परीक्षा शुरु भएको हो ।
