फिल्म ‘साङ्लो’को नयाँ गीत ‘झ्याम्मै आँखा झ्याम्मै’ सार्वजनिक
अभिनेता विराज भट्टको निर्माण, निर्देशन तथा अभिनय रहेको फिल्म ‘साङ्लो’को नयाँ गीत सार्वजनिक गरिएको छ।
आइतबार इन्टरनेटमार्फत सार्वजनिक ‘झ्याम्मै आँखा झ्याम्मै’ बोलेको गीतमा अभिनेता विराज र नव–अभिनेत्री निकिता चण्डकको नृत्य देख्न सकिन्छ।
गायक निशान भट्टराई र गायिका अन्जु पन्तको आवाजमा रहेको गीतमा भट्टराईकै शब्द सुन्न सकिन्छ। सुरेश अधिकारीको संगीतमा तयार गीतको भिडियोमा रामजी लामिछानेको कोरियोग्राफी रहेको छ।
डान्सिङ नम्बरको सार्वजनिक गीतमा विराज र निकितालाई आधुनिक पहिरनमा देख्न सकिन्छ।
यही माघ २५ गतेबाट प्रदर्शनको तयारीमा रहेको फिल्म एक्सन प्रधान रहेको निर्माण युनिटले जानकारी गराएको छ।
नेपालमा एक्सन किङका रूपमा मानिएका विराज भट्ट करिब ४ वर्षपछि नेपाली फिल्ममार्फत् पर्दामा देखिदैंछन्। उनी यस अघि सन् २०१६मा फिल्म ‘जय पर्शुराम’ मार्फत् पर्दामा देखिएका थिए।
नेपाली फिल्म क्षेत्रबाट टाढिएर भोजपुरी फिल्म क्षेत्रमा रमाई रहेका भट्टले आफ्नो नेपाली फिल्म क्षेत्रको पुनरागमन अर्थपूर्ण हुने बताउँदै आएका छन्।
यता फिल्ममा रहेकी मुख्य अभिनेत्री तथा पूर्व मिस नेपाल निकिता चण्डक पनि विराजसँगको डेब्यु महत्वपूर्ण अवसर र अभिनय करियरको महत्वपूर्ण हिस्सा रहेको बताउँदै आएकी छन्।
फिल्ममा विराज र निकिताका साथमा जयनन्द लामा, कामेश्वर चौराशिया, प्रकाश शाह, रापी पन्तलगायतको अभिनय रहेको छ।
